திருப்பரங்குன்றம் வைகாசி விசாக திருவிழா: பக்தர்களின் உணர்வை மதிக்கும் சிறந்த ஏற்பாடு!
ஆறுபடை வீடுகளில் முதற்படை வீடாக போற்றப்படும் திருப்பரங்குன்றம் சுப்பிரமணிய சுவாமி திருக்கோவிலில் வைகாசி விசாகத் திருவிழா கோலாகலமாக நடைபெற்று வருகிறது. திருவிழாவை முன்னிட்டு தினந்தோறும் ஆயிரக்கணக்கான பக்தர்கள் பால்குடம், காவடி எடுத்தும், முருகப்பெருமானை தரிசிக்கவும் திரண்டுவருகின்றனர்.
இந்த நிலையில், கடும் கோடை வெயிலால் பக்தர்கள் அவதியடையாமல் இருக்க கோவில் நிர்வாகம் மற்றும் உள்ளூர் அமைப்புகள் இணைந்து சிறப்பு ஏற்பாடுகளை மேற்கொண்டுள்ளன. கோவில் வாசல் முதல் சன்னதி தெரு முழுவதும் “தென்னைநார் விரிப்பான்” அமைக்கும் பணி தீவிரமாக நடைபெற்று வருகிறது.
வெயிலின் தாக்கத்தால் சாலைகள் அதிகமாக சூடாகும் சூழலில், காலணியின்றி நடந்து வரும் பக்தர்களின் பாதங்களை பாதுகாக்கும் வகையில் இந்த ஏற்பாடு செய்யப்பட்டுள்ளதாக தெரிவிக்கப்பட்டுள்ளது. குறிப்பாக பால்குடம் சுமந்து வரும் பெண்கள், குழந்தைகள் மற்றும் முதியோருக்கு இந்த நடவடிக்கை பெரும் நிவாரணமாக அமைந்துள்ளது.
பக்தர்களின் வசதியை முன்னிறுத்தி செய்யப்பட்ட இந்த முயற்சி சமூக வலைதளங்களிலும் பாராட்டைப் பெற்று வருகிறது. “பக்தர்களின் உணர்வை மதிக்கும் சிறந்த ஏற்பாடு” என பலரும் கருத்து தெரிவித்து வருகின்றனர்.
வைகாசி விசாகத் திருவிழாவை முன்னிட்டு திருப்பரங்குன்றம் முழுவதும் பக்தி பரவசம் நிலவி வருகிறது. பாதுகாப்பு, குடிநீர், மருத்துவ வசதி உள்ளிட்ட முன்னெச்சரிக்கை ஏற்பாடுகளும் தீவிரப்படுத்தப்பட்டுள்ளன.
Follow @ Google News: கூகுள் செய்திகள் பக்கத்தில் LEMOORIYA NEWS தமிழ் – ஐ இங்கே கிளிக் செய்து ஃபாலோ செய்யுங்கள்.. செய்திகளை உடனுக்குடன் பெறுங்கள்.